Bobby在現實生活中有個最佳拍檔傅潔嫻，戲劇世界裏亦有不少好拍檔，今次在無綫劇集《情逆三世緣》中與舊拍檔關詠荷（Esther）上演一段三世姻緣，Bobby說：「我同Esther喺97年合作《醉打金枝》到𠵱家，嗰陣已經好夾，佢係合作最多，亦係隔咗最耐先合作嘅對手，自從拍完《金裝四大才子》後，間唔中都有人搵過我哋，但係啲期又唔啱，之後佢又結婚生BB，今次係因為佢個女大咗，講得明點解媽咪要咁夜返，先有呢個合作機會。」
對於二人久別重逢後的轉變，Bobby說：「我哋都變咗好多，結婚做媽媽對Esther嚟講係一個好好嘅經歷，佢成個人唔同晒，更加有內涵！」他續說：「雖然Esther好內斂，好熟都未必多嘢講，有時我哋都係一句起兩句止，不過冇嘢講唔代表感情唔好，相反我哋感情好好。有次我連續幾日唔舒服，我唔好意思再請病假，咪叫Esther出佢張皇牌，最後佢話上晝唔舒服唔返，叫我唞多陣，下晝先返，其實叫個對手代你冧（廠）真係好難。」但Bobby承認Esther可以克制他：「仲有好多人都克制到我，好似宣萱，同佢開工好大壓力，佢唔係準時就早到，一夠鐘就打嚟問你喺邊，我即刻熄電話！」
外闖測試自己
除了Esther外，今次Bobby與不少新演員合作，他說：「我覺得係好事，一直都有同新人合作，好似周志文、吳業坤，好多都肯做，好畀心機，佢哋咁好外形，咪等吓囉！我咁嘅外形都等到，佢哋唔使等咁耐，等多兩年啦！」近年藝人北上拍劇成風，Bobby算是第一批北上的藝人，他說：「我覺得要出去睇吓，唔睇過唔知香港咁好，唔睇過又唔知出面咁好，冇得比較唔知自己衰成點，又唔知好成點。𠵱家少咗返公司，入廠又有好多新面孔，唔知佢係化妝定梳頭，轉得快證明好世界，魚唔過塘唔肥，最緊要係合作愉快！」
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24