新鮮出爐民選港姐陳凱琳，被喻為近呢十年最索港姐，加上敢言同睿智，唔淨只宅男Iike爆，連師奶、西裝友都buy，真係唔錯。不過陳凱琳個樣鬼鬼哋，唔係太似屋企人，仲傳佢有中東血統㖭，真相係點？就不得而知嘞。
不過，歷年港姐冠軍都不乏混血索女㗎。好似84年冠軍高麗虹咁，啡髮碧眼同高䠷身材省鏡到暈，一睇就知同其他佳麗有段距離。佢係中澳意大利混血，好在細個讀中文中學，所以廣東話都難佢唔到。至於88年冠軍李嘉欣更加靚到唔在講，爸爸係葡萄牙人，阿媽係中國人，佢係正宗「中葡」混血兒，陳淑蘭輸喺佢手上真係無話可說。
不過講到鬼鬼哋，點都唔及06年亞姐冠軍達蓮娜舒夫真高嚟，皆因佢直頭係哈薩克嚟嘅老外啦！當年佢以16歲之齡擊敗群芳，成為史上最年輕亞洲小姐冠軍，不過，佢係唔識講廣東話㗎！
撰文：阿Wow
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！