遊覽觀塘街道，每走一步，都藏着一段歷史。從裕民坊開始走，窄巷商舖猶如石縫透出對岸的陽光，在2016年都要消失。轉彎抬頭就看見銀都戲院，出自著名建築師范文照的設計，再往前走，就是從前香港最強的小販市集，最愛就是涼果檔的黃皮。穿過雞記，剛巧結業，來到協和街小販市場，沿着隱約揚琴的調音聲來到樂美服裝，原來老闆們將要上演一場中樂拉闊。惟有這個廢墟，才能成為他們的大舞台。
重建這個萬家燈火的舞台，創意反而多餘。偏偏，市建局早前建議設計一條新步行街名為「街坊街里」，位於觀塘輔仁街、仁信里及仁愛里一帶的第二期及第三期重建範圍內，除了「街坊街里」，還有4幢住宅、小販市集以及一些公共設施。然而，除了肉麻、低劣諧音創作惹來批評，觀塘居民一再強調：別再在我們的傷口上撒鹽。當現時小販市集檔幾經辛苦才能遷往街市三樓，將來又有幾多觀塘小舖可搬進步行街？原來的社區，人人安居樂業，就像物華街小販市集，發生過數次火災，小販們想到聘請路宿者晚上留守，一有火災即通風報信，街坊街里互相守望。今日，市建局先打着建立以人為本的重建旗號，破壞社區網絡，重建一個像商業城的社區，然後以一條「街坊街里」的溫情來包裝，像港鐵以溫情廣告作掩飾。綜觀香港大型的重建項目，概念設計總讓人聯想起深圳華僑城、電器城的影子，將來每一條特色街道變成各個主題商城，是否為迎合自由行的口味？市建局之心，昭然若揭。
話你知
觀塘市中心項目是前土地發展公司於1998年公佈而仍未實施的其中一個重建計劃，地盤面積達570,000平方呎，影響約1,653個業權及約5,000人，估計項目的總發展成本達數百億元，這是市區重建局歷來最大型的重建項目。
觀塘街坊點睇重建：
得80蚊一日
「『街坊街里』建議真係廢到唔廢，咪即刻想起多個APM。其實我哋只係想有個地方做生意，重建能夠推動社區係好，但自從市建局落地後，生意額大減，得嗰80蚊一日，做保安都有萬幾蚊個月。不過我就係鍾意做小販，街坊街里守望相助，呢啲叫溫情嘛。」
投完標唔出租
「我租咗呢間舖9年，$1,800租，現在封咗舖。惟有日曬雨淋喺舖出面開檔仔，得嗰二萬八蚊搬遷費，我之後點算？之前市建局又話街市3樓有一個舖可以投標，底價$1,300，後來叫到$3,300，最後個舖都冇租出去，你話咩意思？」
唔畀入貨
「我呢度本身有600呎，連11呎樓底有900呎面積，市建局賠50萬，仲話唔同我傾，唔畀我入貨。我一家人都喺模型舖工作為生，你畀200萬我都冇用，我唔可以重新開舖之餘，亦唔夠我一家人往後生活。我唔要錢，只係想原區安置我重新開業。」
樓換樓失敗
「以前土發公司年代，會先起一幢新樓，才拆舊樓，咁樣居民先可以樓換樓。現在你起咗月樺𥧌都冇用，原居民走咗都唔會再搬返嚟，可以搬返嚟都買唔返。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange