【尖沙嘴廣東道】韓國人氣偶像崔始源先排嚟咗香港拍攝陸劍青同梁樂民聯合導演嘅新戲《大峽谷》，前晚又喺尖沙嘴廣東道封路開工，現場除咗兩位導演之外，仲有負責飛車特技嘅錢嘉樂同佢嘅特技隊，都好大陣仗吓，難怪有警員到場了解。
錢嘉樂緊張指揮
前晚大概11點鐘，崔始源着住成套西裝到場，成班工作人員即刻招呼佢，錢嘉樂仲透過繙譯同佢講解戲份，只見佢不停對住嘉樂點頭。之後嘉樂嘅飛車特技隊開咗部六輪車出嚟，上面固定咗一部道具警察電單車，畀崔始源坐上去。正式拍攝時，工作人員就喺廣東道街頭同街尾封路，架六輪車開始沿住廣東道高速飛馳，崔始源對住鏡頭做出左閃右避嘅動作，七情上面，扮到好似真係自己飛車咁。架六輪車先後來回廣東道四、五次，嘉樂好緊張不停攞住兩部對講機指揮，反而兩位導演好悠閒咁傾偈睇鏡位。
拍到凌晨時分，崔始源就收工離開，跟住有一個衣着打扮同佢一樣嘅特技人出現，相信係崔始源嘅替身。嗰個特技人同嘉樂傾完之後，就上咗部道具警察鐵馬，然後沿住廣東道喺車羣中穿插，時速睇落都有成100公里，一直拍到凌晨4點都未收得工。
掙訪：梁繼光、羅德光
攝影：陳順禎、楊浩賢
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24