深水埗及長沙灣共有18項重建項目。海壇街、桂林街、北河街將來發展主題為玉石，地盤會興建住宅、商廈、主題公園，而北河街亦會封閉建造以玉石為主題的小型廣場，名為「玉翠坊」，市建局更建議在唐樓的石柱上融入玉石，深化玉石主題。
深水埗街坊點睇重建：
不敢離舖半步
李太在通州街擁有一間1,200多呎的地舖，連樓上閣樓住宅，但市建局卻量度成700呎而已。李太找專家估價其物業市值2,000多萬元，如今市建局發放賠償金連自置居所津貼只有970多萬元。「我老公以前開五金舖，捱生捱死92年三百幾萬買咗間舖，𠵱家人都死埋，我只可以賣吓幾件衫。以前成條街幾旺，𠵱家其他舖搬走晒，人影冇隻。仔女媳婦都怕治安唔好搬走埋，但冇合理賠償我點都唔會走，死守我老公的心血。試過同街坊當場捉到市建局人員剪天線，後嚟趁我去旅行剪鬼咗。我𠵱家半步都唔敢行開。你哋後生唔好以為唔關你事，將來到你哋層樓俾人收，你就會明白呢種同市建局鬥爭的困苦。」
趕人入絕路
在通州街住了幾十年的梁生：「人哋話人生70古來稀，我咩都唔望，只想有間公屋賠償。74年我租咗5樓，82年27萬買咗。06年我生意失敗，負債纍纍唔怪得人，賣咗層樓，住天台屋，業主失蹤，我申請逆權侵佔，法庭話證明唔到我74年住喺度。我老婆又話同我離婚，但唔辦手續，兩母子住喺油塘公屋，我又申請唔到公屋。我𠵱家只獲27,000元恩恤賠償，仲要我畀番堂費等等，趕人入絕路。市建局回應指其做法合情、合理、合法，同埋冇補充。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange