盤算周末英超心水時，一直在想，頭條人物爆炸頭費蘭尼或者大眼仔奧斯爾；最終決定不捧球場明星，以分頭行先，主攻兩場與比利時巨人前鋒盧卡古息息相關的賽事，捧車仔及西布朗排名一前一尾作客軍。
在英超，球會擁有能力不俗的高大、衝刺型中鋒，成績點都不會太差。摩連奴一向英明也敢玩無鋒陣，但用700萬鎊年薪聘老退的伊度奧做後備，也繼續流放上屆替西布朗於聯賽攻入17球（射手榜排第5）、今屆再借去愛華頓的年輕箭頭盧卡古，難明！當然，球會少一隻「炮」但「車馬」大把，只在今晚尾場作客少讓未開勝門的愛華頓平/半，值博率相對同日曼聯、曼城及阿仙奴等強隊好得多。
愛華頓聘用英超勝率原已偏低的馬天尼斯（對上11次領軍聯賽僅1勝）任新領隊，開季3戰皆和，筆者也有點失望，還要焗放走上屆以11球及5助攻成球會首席射手的費蘭尼；雖然關轉會窗前擸3件，但借將巴利老退中，高價貨占士麥卡菲國際賽後回來冇乜夾過，巧合是能力最勁的盧卡古原本「地標戰」不准鬥車，愛華頓原啞火箭頭，不論出謝拉域或是未夾熟的干尼，難破唞夠的中堅泰利所領導的車仔防線。
撇開車仔上屆是唯一能破愛華頓主場不敗身的英超隊，最重要班波季初已夾熟，包括主力夏薩特及費托等主力，本周二不用踢國際賽，似又要造就摩連奴悶贏一場。
富咸弊在「舊電池」多
沒有盧卡古，車仔不會懷念他，但上季排第8的西布朗，今屆暫排包尾，被外界睇淡留班機會；不過西軍今場作客富咸，筆者對後者睇得更低。
莊家開主隊讓平/半，計戰績，富咸早已在小屋球場變冇牙老虎，對上一次主場聯賽勝仗，是今年4月險勝昆士柏流浪；領隊祖爾又是念舊一族，近兩季不斷買入英超舊電池，年逾30正選成籮，貝碧射術精湛又如何？最弊球隊行軍速率慢，容易被對手洞悉，近兩仗比賽輸給阿仙奴及紐卡素，後備龍大衛史托達成全英超須作出最多撲球的門將。
反觀，對手西布朗明知啞火，借得曼城史葛冼佳亞之後，埋門再用逾千萬鎊，購得新特蘭施斯隆及合用的衝刺型中鋒安尼捷比，班波名氣不及富咸，也不似賣龜苓膏冇龜，咁弊！
蘋果波神
數據做功課 用心去睇波
mailto:[email protected]
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24