【油塘】
【本報訊】一條4呎長水律蛇昨晨匿藏於油塘高俊苑雜物房內，蛇王龐花個多小時翻箱倒籠搬出大批雜物，終發現水律蛇「打蛇餅」藏於箱罅露出蛇尾，詎料捉拿時惡蛇發難，蛇王被咬傷右手，本能將蛇「撻餐懵」，再用箱將其撞暈，交警方及嘉道理農場跟進。
昨晨8時許，俊茂閣保安發現該蛇於地下雜物房外竄爬報警，警方通知蛇王龐到場協助，該蛇卻由門罅竄入房內，他只好入內將爛凳、舊鐵閘及廢棄消防喉轆等雜物搬出追尋蛇蹤。
翻箱倒籠個多小時後，蛇王終發現水律蛇「打蛇餅」藏於箱罅露出蛇尾，立即捉牠尾部，詎料蛇反擊咬傷其右前臂，更圖噬其左臉，幸及時閃避，手一揮將蛇重摔地上，再用箱將其撞暈擒拿交予警方，其後由嘉道理派員撿走。蛇王拒絕送院，雖然水律蛇無毒，但他稱：「咬到都幾痹㗎！不過呢行成日都係咁！」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange