公牛球星戴歷路斯（Derrick Rose），昨午旋風式訪港，作為其亞洲之旅的尾2一站。雖然「風之子」去季整季養傷，但他昨到訪旺角「籃球聖地」麥花臣室內場館，3度「風」狂入樽冧爆球迷之餘，更力證自己100%康復，準備新一季強勢回歸！記者︰鄧永賢、林湛穎 攝影︰馬泉崇
雖然昨日是黑色星期五，不少打工仔及學生要返工返學，無暇追星，但難得11年MVP戴歷路斯首度訪港，昨午仍吸引近百名擁躉在旺角adidas megastore等候偶像。
先與阿Ga拗手瓜熱身
千呼萬喚，D. Rose昨午約3時40分在家人陪同下抵達旺角，可是因為並非公開活動，球迷只能在店外遠望，反而效力甲一永倫的前鋒方誠義（阿Ga），則有幸與該24歲球星「拗手瓜」較量，但雙方爭持半分鐘仍未分高下，終和氣收場。
不過，球迷更關心偶像左膝韌帶撕裂的傷勢，路斯亦向大家派定心丸︰「目前已全面投入練習，練跑、外投也相當努力，腳傷經已康復。東岸今季競爭激烈，網隊基本上將塞爾特人的主力『過檔』，而熱火有很好的球員，但對我而言，我只關注公牛，甚至染指冠軍！」
雙手鋤樽全場高潮
事實上，D. Rose昨完成店內的訪問後，移師至麥花臣室內場館，與藝人周柏豪及劉子健、梁民熊等6名甲一球員鬥3 on 3時，甫落場即射入3分球，已足見他重拾狀態。他及後再個人表演，避過福建「筋肉人」張偉康雙手鋤樽，令現場近1,000名球迷歡喜若狂，而風之子之後玩射波遊戲時，又再兩度施展入樽絕技，球迷high爆不停高呼「MVP、MVP！」
心情大靚的路斯亦相當識做，最後拋了12個簽名小籃球送給球迷之餘，臨走時更即興脫下有自己簽名的Cap帽，拋向觀眾席，冧盡全場。他今午將赴馬尼拉，完成最後一站亞洲之旅。
花絮
變節情侶
大專生情侶阿文（左）同思蕙着住公牛主客波衫，中午就到旺角等戴歷路斯，希望佢可以喺對波鞋上面簽名。原來幾年前佢哋係湖人粉絲，不過戴歷路斯出道後就齊齊變節。
雞手鴨腳
大會請到人氣女歌手連詩雅（Shiga、右）到場，不過唔係同路斯打籃球，而係玩乒乓波，見Shiga雞手鴨腳，揸橫板嘅路斯（左）做佢拍檔，由於路斯運動細胞太好，輕易贏咗周柏豪同劉子健組合。
全家出動
路斯「跟得阿媽」Brenda（左），噚日不時攞出i-Pad影低囝囝嘅一舉一動。除咗阿媽，路斯嘅兩個大佬（左二及左三）同女友（右）都有訪港，令到呢次為期個幾星期嘅亞洲之旅，變成路斯嘅家庭旅行團。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange