現在香港人批評市建局重建速度太快，致使居民無所適從。很諷刺，當年正正因為土地發展公司（下稱土發）被狠批收購重建速度過慢，市建局才取而代之，香港人，悔恨當初？龐婉儀，先後於土發及市建局兩朝任職規劃師，重建項目的利害，她可以談一個晚上。當年土發的重建計劃，某些項目深受市民讚許，包括朗豪坊，當時還未出現禽流感之前，土發聽取專家意見，將雀仔街遷往康樂街，減低其後禽流感爆發的影響；當年賠償租客高達數十萬元，遠超市建局賠償。今天，她如何看待當年對土發的批評？「土發行重建項目艱難得多。第一，土發走商業原則，唔可以輸錢。土發88年成立，英政府即將回歸，不想投放太多資源，所以政府最初會借錢給土發，但都要計利息；又要融資，當時最高有10厘息，唯一尚方寶劍就係政府會幫你收地。呢個情況底下，只有同發展商合作。而政府為免被批官商勾結，幫手收地都非常審慎，慢在所難免。另外，我哋唔同市建局，冇公屋喺手，要先喺同區搵到合適的樓宇畀居民，先拆卸重建。」
市建益晒發展商
不過，時至今天，眼看觀塘仍有一大堆危樓仍未被收購，市建局卻只在市中心發展重建項目；馬頭圍道三年前發生塌樓事件，至今重建速度依然緩慢；衙前圍村亦有官商勾結之嫌。市建局新主席蘇慶和揚言：「市建局其實都係發展商。」究竟，市建局仍是遵行商業，還是審慎原則？龐即解說：「唉！市建局要善用政府資源，名義上係走審慎原則，不過，完全睇得出重建計劃係暴利。你諗吓，以前土發年代，一幢唐樓得幾層，重建後要補地價，但市建局唔使補。唔使收足八九成，政府就會幫手收地，發展商有一塊完全乾淨的土地發展，減低風險。困難低咗，成本低咗，點解仲要起咁密咁高？呢個城市會變成點？仲有生活咩？」不過，土發局發展朗豪坊，點解都起咁高？「當時我都有問，起30層唔得咩，點解要起60層。不過，當年政府向附近熟食中心發錯通告，要打官司，一日花100萬利息，纏擾咗好耐，唔起咁高，彌補唔到損失。」她慨嘆：「仲要以前係發水樓，實用面積收樓，但建築面積賣樓。以Queen's Cube為例，約$3,000呎價收購，$15,000呎價賣出。市建局用咗咁多資源，冇一樣嘢回饋到社會。政府已經少咗補地價收入，發展商唔會因為成本低而減價賣樓，益晒發展商。所以，全世界只有香港富豪單以發展地產致富。」
如夢初醒 離開市建
事實上，不少舊區業主僭建樓宇、舊式買賣沒有法律效力的合約等等問題，市建以「為公眾利益」為由，就可以引用《土地收回條例》，是合法合理，但是否合情？龐分享道：「我曾經都問，我會唔會有報應。99年立法會向財委會建議向受重建影響的居民發放7年，而非10年樓齡的賠償，希望佢哋買番7年樓齡的屋。以前我都會抱怨，都賠咗咁多錢畀你，仲唔肯搬，咁煩！我同事話，如果你朝早起身，有人拍門叫你幾個月後搬走，你會點？你個生活打爛晒。當年重建灣仔，有居民話因為灣仔唔多7年樓齡的樓，一時間居民搶高晒個價，賠償買唔番7年樓齡的樓。事實上，重建真係改善唔到居民生活。有灣仔老人家同我講，平時隔籬屋幫佢做家務、睇住個孫，又喺附近睇醫生，有老人家仲話自己唔搭得車。舊區居民就係靠社會網絡改善生活。有對老人家仲好笑，話50年來未買過樓，畀足賠償佢都冇用；有啲老人家仲反映仔女貪戀賠償金。所以我反思到，政策太概括，唔能夠針對各自的問題。」對於僭建居民，你又有何看法？「如果我係佢哋，我都會咁做。雖然有人話佢哋非法，仲要賠償？但好多家庭一個300呎地方住三家人，佢哋惟有用創意盡量享受更多，人之常情。」
市建局廢噏
市建局永遠都以官方空洞語言回應市民悲痛的控訴，發言人對本報的回應猶如照稿讀。
蘋：蘋果日報 市：市建局發言人
蘋：
市建局繼囍歡里後，再建議觀塘區重建後以「街坊街里」為概念，有指設計本末倒置，販賣溫情，市建局有何回應？
市：
市建局在推行觀塘市中心項目時，開展了兩年多由下而上的四輪公眾諮詢工作，將居民、社區和不同團體的主流意見融會貫通，成為最後的設計方案。設計元素包括跨階層的社區用途和商業服務，既有現代化的佈局，亦有平民化的街舖，以及大量綠化帶、休憩空間和公共設施。至於街坊街里只是設計建議的其中一個概念，目的是希望彰顯觀塘的地區特色。
蘋：
其實，一個社區重建，無論如何某程度上都會改變原來的社區的面貌，市建局對於「以人為本」的重建原則，如何定義？在保育方面如何作出努力？
市：
本局在推行項目時，都會考慮「人」的因素，盡量做到合法、合理和合情。另外，市建局亦為多個大型項目進行廣泛的社區諮詢工作，如觀塘市中心、城中綠洲、嘉咸街項目等。至於保育方面，本局會根據《市區重建策略》，在市區更新項目範圍內保存有歷史文化和建築學價值的樓宇及地區特色。
蘋：
有指政府現時的重建計劃，如將波鞋街打造成體育用品城，囍帖街成為婚嫁商城，為何現時重建計劃都要加上一個主題？有何優點？
市：
市建局致力在其重建項目中及在可行情況下，盡量保留及彰顯該區的地區特色。
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！ http://bit.ly/appletalk24