接近一歲嘅BB，開始要戒奶，官場新丁亦一樣。經過奶媽林鄭月娥長達一年嘅悉心照顧，大家可以見到狼班子內嘅新丁局長已經「戒奶」，脫離奶媽出去亂闖亂撞。八方聽聞，家陣政商界冇乜人笑林鄭係奶媽，反而幫佢起咗個新綽號，私下叫佢「官場美斯」，事關但凡有乜嘢難搞議題，官員埋門一腳冇信心，就一定傳個波去佢腳底，相信佢總有辦法入波，情況一如美斯不斷被餵波solo。
講起嚟，八方又真係好耐冇見過陳謬波同吳得掂孖住林鄭出現，前者發生劏房醜聞，後者搞唔掂國教風波，跟住林鄭出出入入情景記憶猶新，一年後可能自覺有毛有翼識飛咯，又或者嫌奶媽阻碇啦，已經唔見佢哋出雙入對。雖然黃錦星早前都因為擴建堆填區風波，要由奶媽陪住落區，但之後亦單拖去區議會應戰。
印花稅修訂戰將落場
咪以為新丁戒奶，林鄭好輕鬆，相反政商界中人戲言，𠵱家林鄭隨時仲唔得閒，事關但凡啲棘手政治難題，政府埋門一腳都係想由林鄭去處理，除咗之前嘅國教、僭建同堆填區風波，據聞政改甚至印花稅修訂戰，雖然有主責官員搞緊，林鄭都會最後關頭負責射波，好似巴塞隆拿前鋒美斯，隊友門前唔夠信心，一腳踢去美斯就當搞掂，據聞印花稅以及政改，都諗住由「官場美斯」出動。至於特首狼振英嘞喎，政商界中人笑佢連落場踢波嘅能量都冇，似講波佬多啲，齋講已經天下無敵，一係入，一係唔入，得咗。
李八方
mailto:[email protected]
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24