港股高位派貨味濃，唔少近期強勢股都急插，始終二萬三熊仔重倉區打靶後，短期再挾上的誘因有限，未來幾個交易日，相信市況會處於橫行悶局，靜待下周聯儲局議息結果，看看是否真的退市。如伯老冇動作，分分鐘又再挾上。
市場冇方向，資金繼續向細價股及殼股埋手，本欄6月底推介的鎮科（859），開宗明義炒賣殼，悶咗一個月後，於8月終於開車，由7毫子炒到1.62元，升幅1.3倍，相信會有好消息跟尾。
長期低位橫行的股份，一旦大成交突破向上，屬強烈的轉勢訊號，其中一隻係永利控股（876）。今年3月，公司分拆旗下地產業務於主板上市，股價除淨後持續向下，由9毫跌到4.7毫，近月於5毫水平橫行收集，昨突飆升28.8%，報0.67元，成交1,072萬股，創分拆後新高，有炒味！
永利控股分拆地產項目後，目前手上只餘小量前景一般的電子業務，包括家電、電腦及音響器材用的插口，以及耳機的插口，潛力實在有限，上半年營業額倒退20%，毛利率降7.6個百分點至24.4%，持續經營業額虧損1,046萬銀，經營相當困難。
公司現時市值僅2.15億銀，PB約0.59倍，手頭現金逾5,400萬元，佔市值四分之一，可說是一隻乾淨殼；大股東持股69%，貨源歸邊，如能善價而沽，又是一隻「升到你唔信」的股份，目標先睇1蚊。
魏力
http://www.facebook.com/2012jason
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24