萬眾期待嘅蘋果新產品發佈會終於曲終人散，市場劣評如潮，從翌日股價大跌5.4%可見一斑！原因同兩部新機質素無關，大多數不滿係針對被視為拓展平價智能手機市場嘅iPhone 5C，價錢一啲都唔實惠，16G入門版竟然賣4,688元，比市場主觀願望貴成千蚊。老實講，部機只不過係iPhone 5換個膠殼咁大把，更何況家陣市面大把手機平靚正，仲收咁貴，點買得落手。
中港差價補貼旅費
事實上，教主喬布斯兩年前謝世，蘋果創新能力即刻大不如前，估唔到連市場策略亦同iPhone5C一樣咁膠，難道真係「將軍一去，大樹飄零」。
後教主時代，蘋果先後推出兩代新款手機，但iPhone 5同iPhone 5S都只係新瓶裝舊酒嘅食老本貨色，睇怕行政總裁庫克要問米搵救主指點迷津，唔係就好容易「庫」不過三代。
中國今次破天荒成為蘋果首批賣新iPhone嘅地區，可見庫克好重視強國市場，姑勿論新機賣唔賣得，其定價對本港旅遊業應該有利，事關折算翻港紙，係香港買新iPhone仍然係全球最平嘅地區之一，比內地起碼平一張金牛，慳番嘅錢可補貼自由行旅費，一舉兩得也。
世事如棋，當大家喺上個禮拜仍然擔心中東局勢、聯儲局退市以及新興市場唔掂會唔會拖冧個市之際，誓估唔到禮拜日開始頻頻傳喜訊。
先有日本奪得2020年奧運主辦權，市場視佢為安倍振興經濟嘅第四支箭，加上阿爺突然好似食咗興奮劑，幾個內地數據都靚爆鏡，而最𥧌迴路轉嘅係，美國佬空襲敍利亞嘅計劃突然急煞車，令市場啲負面因素突然間消失得七七八八，個市即刻龍精虎猛。
以美股為例，道指截至周三已連漲七日，澳洲同歐洲股市亦創近五年高位，新興市場亦回穩。至於黃金同石油這類戰爭概念資產，正如早前話聊齋只係虛火，金價噚日已跌至每盎斯1,338美元嘅三周低位，油價亦落番去每桶107美元水平。
澳元交叉盤先平手離場
上個禮拜曾經建議喺澳元兌日圓92水平開淡倉，但唔好彩撞正上文提及嘅市場氣氛大逆轉，加上市場炒中國經濟復蘇，澳元兌日圓本周曾衝上93.5，賬面輸約150點子，好彩噚日澳洲公佈嘅失業數據麻麻，執筆時唔使輸。
聯儲局下周三議息，由於市場認定儲局多數會啟動退市，所以除非退市力度較急進（估計機會唔大），否則隨時被市場視為好消息咁炒，加上中國經濟轉好，對澳元這類風險資產貨幣應該有利，穩陣起見可選擇平手先行離場，待議息結果塵埃落定，才決定下一步行動。
奇兵
本欄逢周五刊登
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange