特區政府噚日公開前廉署公務酬酢獨立調查報告，同日八方嘅同事就咁啱得咁蹺，巧遇另一位前廉政專員兼保安局前局長李少光獨自搭港鐵，只見西裝骨骨嘅李sir攞住公文袋，全程車皺住眉頭，神色好凝重，好似好多嘢諗緊咁噃，最後喺九龍塘站落咗車。
自稱失業 慳得就慳
李sir喺港鐵現身，一啲都唔奇，就算喺巴士出現，亦都係平常事，事關現年65歲嘅佢同八方講呀，真係要多謝狼英德政（其實由煲呔曾提出），畀佢呢啲長者可以用兩蚊雞就搭到公共交通工具周圍去，笑稱自己係失業人士，梗係慳得就慳，減少駕車，但如果要接載老婆大人就例外，必須自己出動接載先夠體貼。
佢仲話冇做局長之後，冇咗司機同秘書都有啲唔慣，好在仲有iPhone幫佢記低啲行程，又話平時着得好求其，噚日約咗朋友食飯先執到正。
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24