噚日推介嘅國美（493），其位於四川嘅家電倉庫發生大火，幸暫無傷亡消息，事件令股價逆市挫3.1%，執筆之時未見國美有最新公佈，據悉案發地點面積達3,000平方米，相信公司已買重保險，損失理應有限。近來股價累積升幅已大，或是借勢調整，當然為穩陣起見，戰友可以0.9元作止蝕位持有。
港股喺23000關浮沉，炒內地復蘇概念似告一段落，未來主宰後市嘅因素，肯定係下周儲局議息會議，呢幾日好大機會悶局橫行。
大市高位整固，則更加有利二三線股發圍，天業節水（840）噚日炒高12%，成交量創近三年高，絕對唔係乾炒咁簡單。天業節水主要從事農用塑料節水器材、塑料管材開發、加工、生產、銷售及節水灌溉施工安裝，絕對食正「十二．五」規劃聚焦農業及水利概念。上半年受累市場競爭劇烈，盈利倒退92%至36萬人仔，今年股價最多跌近五成，已反映相關壞消息，最重要係天業節水底子夠厚，現價PB僅0.43倍，與其他水務股普遍有溢價比較，估值絕對平到笑，集團預期下半年行業會汰弱留強，盈利有望回勇。估值前景皆有憧憬空間，噚日那一棍，好可能只係反彈浪嘅序幕！
唐牛
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24