【亂噏24：第10集】柒的意義到底是甚麼？《狂舞派》導演黃修平作出完美示範，就是與世俗觀念背道而馳，將一件事搏盡完成。日前他帶着監製陳心遙、「柒良」蔡瀚億（BabyJohn）和顏卓靈（Cherry）亮相《亂噏24》，跟黎智英（肥佬黎）和蔡瀾分享一個很「柒」，但很「型」的故事。《亂噏24》足本版逢周四晚上11時播出，可在 http://bit.ly/appletalk24重溫。
撰文：馮國康、Sidekick
基本上，筆者不需再用筆墨描述《狂舞派》有幾好睇，facebook、Instagram、forum的討論已說明一切，最重要是，還吸引到肥佬黎和蔡瀾買飛捧場。肥佬黎一來便發揮生意人本色，單刀直入問黃修平導演用了多少錢拍攝，當得知只用530萬時即驚嘆：「做宣傳都未夠呀！」然而電影已累積票房過千萬，差不多夠回本，導演篤定開拍續集。肥佬黎對面前這幫年輕人能成功感到不可思議：「得嗰五百零萬，一班臭𡃁仔，可以做得咁成功，我覺得對整個電影業好大鼓勵。」蔡瀾補充一句：「同埋擺脫大陸嘅魔掌！」
Cherry在片中飾演舞癡阿花，跳跳紮形象相當討好，肥佬黎問：「你係咪由細到大都發明星夢？」Cherry如實答：「其實當初真係。細個成日睇歌唱節目，個心好衰就諗，你咁都得？我成日喺浴室沖涼都唱歌㗎啦，我又識跳舞喎，可能我都得呢！」至於飾演太極高手柒良的BabyJohn雖有舞台劇經驗，銀幕演戲還是第一次，不過肥佬黎激讚他入型入格，尤其玩紙巾一幕簡直出神入化。觀乎BabyJohn當日舉止，仍是滿口「之乎者也」，夾餸斟茶的動作也很「太極」，看來未完全抽離戲中角色。
黃導憶起當初拿着劇本搵投資者時處處碰壁，偏偏曾麗芬獨具慧眼，他憶述：「佢話『你知我份人啦，人哋覺得唔掂呢，我就最鍾意做！』我當時覺得非常之型。」說到型，Cherry四年前試鏡簡直型到爆，她本來學了一part舞，但試鏡當日，發現音樂版本跟她學習的有出入，令她音樂中段沒有編排舞步。她說：「我膽粗粗行入去，拎住隻歌話我啲舞有啲問題。跳到中間去到我冇嘢跳嗰個位，我就亂嚟話『我好鍾意跳舞㗎，揀我啦！揀我啦！』跟住就跳番。」就是她這份率真打動導演，肥佬黎認同：「你咁沙膽，咁有自信。冇揀錯！」
若要雞蛋裏挑骨頭，肥佬黎直指兩位主角kiss一幕太錫身：「你錫柒良嘅時候唔係真吻囉，你就住囉！如果你吻，一定用埋脷呀，伸埋去呀。呢個假嘢！」BabyJohn和Cherry仍感尷尬，Cherry說：「我仲記得導演行過嚟話，你哋傾吓偈先，令氣氛越嚟越尷尬！」BabyJohn插嘴：「都係咁講啦，你哋冇嘢，又點會覺得我有嘢？」
導演受宮崎駿影響
Cherry羞澀的表現令肥佬黎誤以為她未拍過拖，她似乎不想多談情事，轉移視線稱她當日仍對電影抱有懷疑，擔心電影劇情跟現實距離太遠，畢竟「夢想」並非人人都可掛在口邊。但肥佬黎認為正正就是電影主題簡單直接才會成功，他說：「好多人拍戲都係，將好多小節擺入去，將套戲搞亂。」黃導大表認同：「我以前對美術、小節好敏感、好講究，但我知道如果呢套戲我針住啲細節位，會搞唔掂。我唔衰得呢套片！」
黃修平踏實穩重，做導演肯定不是貪過癮或即興，蔡瀾當然看得出，至於影響黃導最深的人，原來是剛宣佈引退的日本動畫大師宮崎駿。至於最啟發到他的電影，便是89年上映由羅賓威廉斯主演的勵志電影《暴雨驕陽》：「我中四嘅時候睇，覺得睇完套戲原來可以咁盪氣迴腸。」蔡瀾提出現在跳街舞的人，都受到米高積遜影響，黃導又何嘗不是？更自爆兒時趣（柒）事：「喺屋企無端端着隻襪，做乜？跣啲囉，喺個地板度做moonwalk呀！」
「唔柒就唔係青春」
電影最搶的角色非柒良莫屬，BabyJohn笑稱導演本身最似柒良。黃導說：「其實我唔止似柒良，我都似阿Dave、似Rebecca，似阿花。有時我寫一個角色，梗將自己分散開唔同嘅嘢，我同佢都柒柒哋，無謂五十步笑百步啦！有朋友留言喺facebook，話唔柒就唔係青春！我覺得好有道理。」肥佬黎想聽他闡述「柒」字意義，黃導笑說：「柒應該係好笨實咁解，哈哈！我諗係一啲好怪呀、唔同世俗嘅潮流，同世俗嘅norms格格不入嘅一種稜角。」黃導繼續分享他的青春「柒」事：「我讀中學已經諗緊可唔可以學校有電影學會？都可以拍部片出嚟呢？我仲諗兩部錄影機咪得囉！一餅帶拍完，過餅帶，咁咪逐個逐個shot，pause-play-record咁囉，我真係做過呢啲嘢！」
狂舞派呻資助少 香港藝術難追日韓
http://bit.ly/talk241001
靠狂舞派上位 濕身阿花認發明星夢
http://bit.ly/talk241002
創新競爭力下降 港人睇死自己友
http://bit.ly/talk241003
螢幕初吻驚青 男星險變鹹豬嘴
http://bit.ly/talk241004
宮崎駿光榮引退 港創意工業高危
http://bit.ly/talk241005
火辣街舞 早熟少女UN出驚喜
http://bit.ly/talk241006
70後帶頭 一部DV創千萬神話
http://bit.ly/talk241007
黃修平：狂舞派係九記牛腩麵
http://bit.ly/talk241008
回歸15年 港人最憎內地化
http://bit.ly/talk241009
娛圈潮流 女星越紅越整容
http://bit.ly/talk241010
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24