天津港發展（3382）附屬A股天津港股份（滬：600717）短短兩個半月，股價翻咗半番。天津港現價及PE，仲係挨住歷史低位，殘到冇譜，勁抵買。
天津港主打集裝箱、散雜貨裝卸及港口配套業，06年喺天津發展（882）分拆出嚟，上市價1.88元，現價1.13元潛水唔在講，仲要咁睇，天津港由08年金融海嘯期賺得1億銀，極速彈番上12年度7億銀純利，兼上市以嚟高位。而集團今年半年度，純利繼續增長14%，到4.25億銀。但天津港現價，仍然低過08年10月慘烈月收市價1.5元，相對07年高位9.69元，大跌近九成，有冇搞錯？
附屬A股天津港，由6月尾到家陣翻咗半番，以天津港應佔A股權益市值，上到88億銀，天津港本身總市值，得69億銀，再印證津港真係殘到爆。
再講，祖國7月港口完成貨物吞吐量9億噸，同比增加10.4%，而8月全國進、出口總值，亦都升咗7%。
至於航運界其中一個寒暑表「波羅的海指數」，由上年年尾的699，升到家陣冇回頭，翻過一番去到1540樓上。下半年數據繼續靚仔，天津港就有運行。唔好計多，天津港今年純利起個孖到8.25億銀，增長20%，PE跌到得番8倍。
航運復蘇 博翻一番
又天津市上年獲阿爺定位為「國際港口城市」，該市呢期亦上報「自由貿易區」規劃，若果成事，天津會係繼上海之後，另一個重要自貿區。港口股當中，天津港主場之利彈出。
博天津港翻一番到兩蚊樓上，PE得16倍，未有耐追到往年平均22倍，而天津港當炒期，PE係講緊59倍。
錢雋
細價股專家
本欄逢周二、五刊出
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24