周杰倫演唱會今日開鑼，近年佢甚少露面，怕且忙住做生意，自從佢投資古董店後，做生意做上癮，又搞主題餐廳、服裝潮牌，連鎖KTV，今年周董在《福布斯名人榜》排第二，勁過劉華。
咁多瓣數最終賺定蝕冇人知，但佢肯定係marketing高手，一部自創品牌手工鋼琴，就要65萬人仔，佢曾經講過，「電影叫甚麼不重要，周杰倫導演才重要。」唔知周董吸金大法能否幫文化傳信（343）大賺特賺？
今次演唱會贊助商正是佢入咗股的文傳子公司Ucan，早前佢擔任其文化大使兩年，授權可用其肖像、姓名及聲音作設計、生產及發行產品，押下自己個朵周董都唔想衰的。Ucan嘅3D社交平台有誠意地搵咗IBM搞，近排動作多多，推「中華英雄Puzzle」手機app，文傳又拍埋TVB合作，開發以經典劇手機遊戲。
雖然它具演唱會加埋網遊概念，可學3D數碼（8078）玩下gimmick，但只宜短炒，事關遊戲呢家嘢都係燒錢玩意，公司全年虧損擴大至3億元，Ucan𠵱家先係開發階段，開發費已逾億，雖然公司話暫無融資需要，但儲局議息在即，最緊要轉身夠快！
Samantha
本欄逢周一、三、五刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange