上季玩完馬後炮，今季就做預言家，同大家一齊睇吓嚟緊周末有咩好睇。今周傾乜：巴利天價上「馬」。
近日搭地鐵返工，終於見番學生們喺車廂追追逐逐，提醒小弟暑假完結，莘莘學子又要返學。96年暑假對小弟嚟講，都有好多嘢發生，好似剛完成高考準備上大學，又人生第1次踏足亞美利堅，仲有紐卡素以1,500萬鎊轉會費收購布力般流浪前鋒舒利亞，打破當時世界紀錄。
當年全球驚訝嘅轉會費，變番今時今日已經唔係咩錢，今夏英超轉會市場，安祖卡路爾、馬馬度沙高、舒賀爾尼等貴過舒利亞，唔好再講費蘭尼、奧斯爾呢啲天價收購。學財經分析員口脗，多國量化寬鬆，資產價格飛升，銀紙已不斷貶值。𠵱家1億歐元買加里夫巴利係天價，10年、20年後，1億歐元或只買到個青年軍學徒。
要比較巴利嘅價值，淨係講佢喺球場上作用冇咩意義，從來皇馬買球星，都唔係只睇佢有幾好波，最緊要係人氣夠。好多人講皇馬買卡卡係「Total loss」，不過以卡卡喺南美同亞洲嘅人氣，其實都應該幫皇馬搵唔少錢，C朗喺09年以8,000萬鎊由曼聯加盟，夠嘩嘩聲啦，不過以C朗歷年來拍咁多廣告，又幫皇馬賣咁多波衫，仲有西甲冠軍落袋，呢單deal都有賺冇蝕。巴利又點呢？皇馬出咁高價買佢，係睇中佢嘅潛質，講真巴利𠵱家人氣集中於英國，喺歐洲其他國家，以至亞洲、南美等市場，一定及唔上C朗、美斯等，佢外型又唔算靚仔，真係要睇吓皇馬嘅包裝神功，又點幫佢打造成新一代球王。文：牽牛
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24