【變招搵食】
撤銷辣招機會微，代理力谷一手盤。中原亞太區住宅部總裁陳永傑表示，新盤「養唔活」一眾代理，「太多人去做新盤都無用，新盤賣得百零間。」他稱：「目前是五十五十，新界同事多啲做一手，香港及九龍同事就多啲做二手。」
對於日前中原推出帶客睇新盤有100元交通津貼，提供1,000個名額，預備10萬元，「目前只派咗200個，比我預期慢，諗住三幾日就畀晒。」他透露，準備加碼，增加2,000個名額，預算20萬元，整個制度到9月底完結。
政府企硬不撤招，地產代理垂死掙扎，在立法會復會前，繼續爭取立法會議員支持。中原創辦人施永青接受本報電話訪問表示：「修訂係由議員決定。」
香港地產代理專業協會會長郭昶表示，未來兩周將與不同黨派立法會議員會面，爭取支持。他稱：「政府以為撤消辣招，樓價會上升。你試下撤招呀，樓價隨時跌三成。當業主賣來賣去都賣唔到，係人都知會跌嘅時候，仲邊有人買呀，再加埋一大堆一、二手出來，無人接嘅話，咪冧囉！」他稱，如果辣招完全不作任何修訂，不排除透過司法覆核，指出政府實施的辣招有違《基本法》提及低稅制的憲法規定。