【本報訊】堆填區滲漏「大鑊」，但對大埔怡雅苑一帶逾4,000名居民來說，污水渠滲漏工程更「大鑊」！居民每日忍受屎渠味，原本一個月做完的渠務工程，要拖足半年，「晚飯後臭到想嘔番出來」、「臭到唔使瞓」；空置單位也租不出、賣不去。
記者：龔蕙芝
大埔一些地區的污水，本來經汀角路地下的污水管排走，但今年5月水管滲漏而停用，渠務署就在怡雅苑旁的大元泵房，裝建多台臨時水泵應用，每天挖起和清洗污水泵的沉積物，引發惡臭。
受影響的民居，以大元泵房旁邊的怡雅苑及新興花園最慘，其中圍繞泵房的四棟大廈、共1,200戶首當其衝，估計影響超過4,000人。由於臭味頻密，有區議員於6月向渠務署查詢，獲覆7月中會完工；但至7月中，又再推說要延至8月底，拖足3個月，一再延遲完工日期，令居民非常不滿。
關窗開冷氣難阻臭味
記者到現場採訪，臭氣果然沖天！連住在35樓的居民都受困擾，單位對正泵房的嚴太，以「大陸廁所」來描述臭氣，「6月開始臭，開頭以為係坐廁傳出，之後先知係泵房出事，你幻想日日好似個鼻只聞到屎味」。路過必要掩鼻，即使關窗開冷氣，臭氣亦時有滲入，「住最高層都咁難頂，住低層仲慘啦」。
另一住戶張先生說：「晚飯前臭到食唔落，晚飯後臭到想嘔番出嚟！」他以「臭到嘔」來形容現時情況，最慘臭無定時，如果風向吹正，氣味可維持幾個鐘，甚至整天久久不散；如在晚飯時間「直情唔使食飯」，現在晾衫亦不會放近窗邊，又被迫長開冷氣，「熱就話開冷氣，天氣涼啲唔開冷氣，真係臭到唔使瞓」。
附近有業主更因此遲遲租不出單位，「帶客嚟睇樓，一聞到陣味都唔敢租啦，客人以為住呢度就係咁」，更遑論賣樓。
渠務署發言人承認，清洗臨時泵房會傳出臭味，但已盡量密封通風口，而且每星期只作一至兩次、於辦公時間內清洗。工程延誤是因為署方不欲影響路面交通，而採用地底維修，工程預計於11月底前完成，對影響附近居民生活致歉。
大埔區區議員任啟邦批評，「原本一個月嘅工程推咗幾個月都未搞好，就算𠵱家話係11月，我都冇信心會如期完工」。對於署方指每星期僅兩天做清洗，他反駁指，臭味天天有，辦公時間外亦有異味，尤以假日用水高𥧌期為甚。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange