莎莎（178）位於銅鑼灣嘅兩萬呎概念店，噚日下午亦舉行開幕酒會，老闆郭少明認真交遊廣闊，喺商界、保良局、公益金、馬圈認識嘅好友，幾乎全部出現賀佢開舖，人唔到都有花牌到，現場賓客起碼有500人，花牌至少50個。
郭少明兩位靚千金亦罕有咁盛裝出現。大女Melody一身花裙，佢老公就着住套桃紅色西裝，襯晒莎莎嘅招牌顏色。細女Kitty亦着桃紅色上衫。三位勁開心咁喺現場玩貼紙相機，仲拉埋阿媽郭太一齊影。
聽聞，兩位千金都喺莎莎工作，細女近年幫手搞中國市場。查實兩位千金咁省鏡，郭少明應該叫佢哋多啲出席公開活動做生招牌啦。
賓客之中，前日去完新股推介會嘅麗新系主席林建岳，噚日又走去捧莎莎場，思捷（330）剛公佈超差業績，主席柯清輝似乎心情麻麻哋，愁爆諗計咁款。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange