周二巴西友賽葡萄牙，我求大俠仲諗住可以預先睇吓尼馬鬥基斯坦奴朗拿度（C朗），可惜C朗受傷冇踢，畀尼馬一個人威晒，佢又入波又助攻，幫巴西大勝3:1。
1扭4射入金球
呢場波，巴西球王兼傳奇10號比利孖住葡萄牙「黑豹」尤西比奧都專登嚟捧場，有兩大神級球王在場，做細嘅尼馬立即上晒身咁，特別加多幾錢肉緊。雖然葡萄牙靠魯爾梅利斯先開紀錄，但貴為森巴新10號嘅尼馬喺24分鐘斬角球，助攻堤高亞施華頭槌建功，追至平手。10分鐘後，尼馬見隊友幫唔到手，就索性一個人帶波殺入禁區，先避過比比同米基爾維路素嘅夾擊，再喺般奴艾維斯同法比奧干查奧嘅包抄前射入，將成條葡萄牙防線玩弄於股掌之中，真係睇到我求大俠拍爛手掌！再加埋祖奧下半場嘅入波，巴西輕鬆贏3:1。
尼馬呢輪國際賽真係搶晒鏡，上星期巴西對澳洲，佢都有一個入波，仲造出兩個助攻㖭；呢場佢亦唔失禮，入球同助攻各一個，可見呢位巴塞隆拿射手能傳擅射。巴西教練「大菲」史高拉利就當然老懷安慰：「尼馬有料到㗎！佢嘅盤扭好具威脅，可以爆破對手防線，人哋好多時要靠犯規先阻到佢。我唔知應唔應該用『受害者』呢個詞語，但尼馬成日被侵犯，球證應該多加留意。」
大菲book定施薩
除咗尼馬開心，巴西門將施薩索拉斯都好興奮，因為大菲同佢講咗，佢一定有份踢出年嘅世盃決賽周。呢兩場都打正選嘅施薩話：「我同你哋一樣咁驚喜！我覺得史高拉利一直都好保護我，好多人都關心我有冇得踢。𠵱家我目標清晰，就係喺嚟緊8個月努力維持最好嘅狀態，迎接世盃。」34歲嘅施薩曾被前教練文尼西斯棄用，𠵱家同昆士柏流浪一齊淪落英冠。
另外，大菲話，世盃嘅大軍名單已經定得七七八八，「我本身已經定咗17至18個球員，睇完上場對澳洲同呢場對葡萄牙後，我覺得有多一、兩個可以入圍。我之後會繼續召啲新球員，睇吓佢哋表現成點。」巴西下個月會友賽另一支已經出線決賽周嘅南韓，同埋非洲嘅贊比亞。
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24