公民黨黨魁余若薇噚日60大壽。啱啱榮升外母、多咗半邊仔嘅Audrey話，今年三個女加埋二女女婿夾錢請佢同老公胡健維醫生去旅行，當做生日禮物，但係去邊度、幾時衝上雲霄就唔肯講，可能二人世界，唔想外人騷擾啩。
坦言對年齡好敏感
女人六十，余若薇聽到八方對佢講生日快樂，都似乎有啲唔自在，之後就展露佢招牌笑容：「始終女人年齡要進入另一個數目，有啲敏感。哈哈哈！」
擺完喜酒，但係唔擺壽酒嘅Audrey話，已經食咗好幾個生日蛋糕，許咗幾次願，為咗靈驗唔講得係乜。今年較為特別係佢以往咁多年10幾個法律學生，一齊請佢食咗餐飯。而公民黨早前已幫佢慶祝咗。不過無論旅行定係食飯，邊夠老公胡醫生送嚟一束花咁sweet先？佢同老公嘅合照噚日上咗facebook，Audrey話，有人就話佢眼袋太大，叫佢敷吓mask護眼，所以未來要好好努力保養。
Audrey今個月28日會喺喺銅鑼灣誠品主持一個有關文學巨人魯迅嘅講座，主題叫做「今天的吶喊：從魯迅的《阿Q正傳》到舞台劇《阿Q後傳》」，想一睹Audrey嘅風采，記住留意。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange