影帝張家輝最近憑一齣《激戰》熱爆全城，原來佢除咗識做戲，買樓投資一樣掂，過去10年買賣過3個物業，賬面利潤合共超過2,500萬元，上月底佢再拎955萬元出嚟，畀老婆關詠荷買入跑馬地一舊樓單位，咁大份中秋節禮物，一定人月兩團圓。
張家輝2004年後買賣物業都有斬獲，最勁係前年，賣走薄扶林貝沙灣勁賺過千萬元，早年又買入跑馬地逸廬單位自住。
土地註冊處最新登記顯示，張家輝太太關詠荷以個人名義，買入跑馬地嘉柏大廈23樓B室，作價955萬元。娛樂八卦新聞不時傳出，張家輝同關詠荷關係麻麻，關詠荷自己買樓，唔通真係有嘢？
華華噚日搵到身在台灣嘅張家輝，原來係大家諗多咗。佢承認買咗層樓，指層樓係佢畀錢，名就寫老婆。入市原因好簡單，佢謙稱「近年做嘢都搵到啲錢，老婆話不如買樓投資」，佢見老婆生仔咁辛苦，就當係送畀老婆禮物，答謝佢。
23樓B 諧音「易生B」
中秋節通常送月餅、水果做禮物，張家輝臨近中秋佳節送近千萬元物業畀老婆做禮物，關詠荷勁冧啦！呢個樓盤超過40年樓齡，雖然實用面積645呎，但地方應該比𠵱家啲新樓見使，又就近銅鑼灣，算係筍盤，話時話，張家輝本身咪就係筍盤囉。
有趣嘅係，關詠荷呢個單位喺23樓B室，諧音「易生B」，希望佢哋成功生多一兩個BB啦。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange