一間公司要上市，英文稱為「go public」，意思是公司上市後就屬於「公眾」，屬於每一個持有股權的股東，不論你是持有一成，還是一股。董事會要向所有股東負責，包括牛頭角散戶順嫂，而並非只為某一小撮人服務。雖然實際運作起上來，很多時都未能做到絕對公平，但起碼是應朝向這方向盡做。如果唔係，你做私人公司得喇，咪鬼嚟上市。
你以為海迪又想講阿里巴巴？其實現時市場已有唔少騎呢例子，大股東或經營者，當正上市公司是自己私人企業來玩，其決定是否符合整體股東利益？似乎不太在乎。
如在深圳經營低檔百貨生意的歲寶（312），最近就發出咗張令海迪啞言失笑的通告。歲寶話，原本的CEO因身體問題請辭，決定委任大股東的兒子楊題維做CEO。呢位楊公子當真年輕有為，年僅26歲，幾乎是一大學畢業就入歲寶工作，四年後做CEO。可能歲寶都自知「瀨嘢」，同時間再宣佈搵前AEON（984）香港「一哥」林文鈿加盟，個職位係叫做「CEO策略師」！恕海迪孤陋寡聞，呢個職銜係乜意思呢？即古代扶育太子的攝政王？因太子年紀尚幼，恐難駕馭眾大臣，故設立太傅一職，則能外平眾議？
呢招留番拍清宮劇或者有用，但用在上市公司，叫小股東如何信服這些任命，是符合公司整體利益？
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange