呢個世界真係冇永遠敵人或者朋友，美國AIG同股神畢菲特（圖）本來合作無間，最近竟然決定唔跟股神投資旗艦巴郡旗下再保險公司續約，原因係畢菲特挖走AIG四名高層，開新公司同AIG直接競爭。
畢菲特今年上半年講過，計劃大搞商業保險，呢瓣係AIG強項之一，股神咁講，擺明有意搶生意。
被畢菲特挖走嘅四名AIG高層，仲係大型險同意外險專家。股神之後喺巴郡旗下開咗間新公司畀四人打骰，佢哋喺短短幾個月時間，又向AIG同其他機構狂請人，喺波士頓、紐約、芝加哥等地都有人開始做嘢，來勢洶洶咁款，難怪AIG唔同佢續約，不過只限於再保險業務，其他合約保持不變。
輸人唔輸陣，AIG行政總裁Robert Benmosche之前回應話，佢哋有大把人才㗎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange