今時今日，就算陳茂波寫網誌，提出「我阿媽係女人」，一樣會俾人圍插。梁粉們當然憤憤不平，認為傳媒由始至終針對佢哋，對人不對事，有意針對梁班子。其實梁粉呻足一年半，呻到樹葉落晒都冇用，好似挺梁歌手G.E.M.一樣，歌迷也為佢抱不平，指她有言論自由，點解傳媒網民要針對G.E.M.。其實原因好簡單，因為政治本身就係對人不對事，雙重標準。
有權有影響力 雙重標準屬必然
點解當權者、公眾人物要謹慎言行，因為有權有影響力，唔係普通人，所以傳媒一定係雙重標準，對人不對事。一個維園阿伯在早茶大噴口水花，認為要在大欖郊野公園起公屋，冇所謂，因為佢係一個冇權冇勢維園阿伯。但陳茂波講就一定有所謂，因為佢係問責局長，掌握全港土地開發政策，講得出真係有可能做得到。對唔住，陳茂波在政策及政治問題上，係冇言論自由。同樣梁振英要求舉報張震遠、林奮強人士道歉，並不屬於個人言論自由範疇，特首可以講種花、推介好電影，但涉及執法機構，就冇言論自由。
所謂務虛討論，都唔可能由問責局長求其寫篇網誌當交差。外國有執政黨政府，意識形態及務虛討論，由政黨系統、研究單位、智庫學者及黨派傳媒發動，官員和應，一唱一和去鼓動風潮，絕冇可能以「有人提出」為論據嘅小學雞式網誌作起動。
網誌可以寫軟性題材，個人感受，包裝政客形象，由始至終唔適宜用來討論政策。因為政策討論用字措詞比較嚴謹，分析論證要有水平、有說服力，試問一班雜牌軍業餘政客，點可能有此能量，通過一篇文章去發動一場關於土地資源運用嘅爭論，真係嘥氣。
如果真係要務虛爭論，唔該政客將討論水平提高些少，層次高番些少，好似上屆政府提出「進步發展觀」，認為保育與發展平衡，不可只重發展，起碼論述層次比「在郊野公園內建屋」高些少。務虛討論就係傾大原則、大方向、意識形態，而唔係硬砌具體政策。梁粉們水平低，區議員質素，獻醜不如藏拙。
陳茂波醜聞纏身，民望乃十多年以來最低的問責官員，已到了乞人憎的地步，佢即使言之有物、言之成理，傳媒與公眾都唔會聽得入耳，政治上佢已經係一個喪屍，掂親邊瓣，邊一瓣就會死。
連政治ABC也唔曉，仲話要爭取話語權，真係笑死對家！
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange