有銀行界人士噚日請咗一班商界老友，喺舊中銀中國會同新任駐港美國總領事夏千福食飯。飯局後，八方見到夏千福離開，即刻上前同佢打招呼索料，可能記者嘅出現令夏千福有啲愕然，見唔到自己嘅座駕，又唔想企喺度畀記者不斷問，最後拔足狂奔。最終唔通佢要徒步返領事館？
呢個商界飯局唔止打招呼咁簡單，對夏千福嚟講，仲係個「招商飯局」。因為夏千福喺飯局度同班商界講，日後會多促進港美兩地生意往來，如果港商想同美國人做生意，嚟緊11月有個「Select USA」招商會，大家可以留意。
飯後夏千福離開，八方上前打完招呼，問吓佢係咪好鍾意幫襯香港老店？點睇外交部駐港特派員宋哲叫佢唔好從事與身份不符嘅活動？
司機呆等20分鐘
夏千福一句都唔答，只顧不斷向前走，叫記者有問題就問公關部，最終佢同記者交換卡片握手之後，就向住遮打花園方向離開。
夏千福走咗之後，佢架寶馬戰車先至嚟到舊中銀，結果司機呆等約20分鐘，知道夏千福已經閃咗，惟有開車走人。查實記者唔會食人，夏千福多等一會，閒談兩句，咪唔使走冤枉路囉。
美國駐港總領事館發言人話，傳媒有乜嘢想問夏千福，大可以等本月24日，夏千福當日會出席美國商會午餐會，會後接受傳媒提問。想喺當日同夏千福食飯唔平，一餐飯要畀650蚊，公司包枱要6,600蚊。
李八方
MAILTO:[email protected]
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24