蘋果發佈會完全冇驚喜，iPhone 5C玩單色都算，玩雙色都玩得咁醜怪。蘋果一向賣點係型，𠵱家拎住佢仲點型？至於部iPhone 5S稍為可取係玩指紋開鎖。
有分析指蘋果推指紋識別功能，係為日後將iPhone發展成「虛擬錢包」鋪路。雖然Tim Cook創新方面麻麻，但度橋搵錢能力方面絕唔可以睇少。
有咗「虛擬錢包」，蘋果可發展埋B2B業務，進一步開拓新財源，所以有咁嘅猜測都合理。
查實早前已有傳三星、微軟都有意於產品加入指紋識別功能。今次蘋果搶先推出，以後其他品牌推出嘅產品，當然奉行「人有我有」，所以產品指紋技術潮流，只係剛揭序幕。
早前A股、以至世達（1282），已瘋炒指紋識別技術概念，但有呢種業務嘅公司，仲有百利保（617）。
百利保全資持有嘅303科技及深圳創先智能科技，主要從事研發生物識別技術，開發相關電腦軟硬體。產品包括多款指紋機、指紋模塊、門禁管理系統等。雖然目前業務貢獻公司收入比重唔多，但市場咁睇好呢種業務前景，借概念炒一轉都唔奇。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange