小弟依然認為「萬般帶不走，唯有『殼』隨身」，呢期仲係興殼股，唔好畀佢停，繼續靚殼，今日介紹嘅係已轉咗手嘅殼股中國三迪（910）。
呢隻以前係牛央嘅至愛中國林大，不過，前年9月已經轉咗手畀𠵱家個新老闆郭加迪，數數手指，剛好兩年，係時候可以搞注資，上個月就已經搞咗個頭炮，拍住大股東發展西安地產項目，但呢part只係頭盤，主菜梗係母公司郭氏集團旗下嘅房地產資產啦，而𠵱家三迪嘅市值只得4.5億元，相比其他已炒起但仲未做注資嘅內房殼股十幾廿億市值，仲差一大截，保守啲，睇10億元市值，三迪可以先睇1.46元，潛在升幅121%。
新老闆來頭勁 注資概念足
呢位新老闆郭加迪來頭唔簡單，佢係全國政協委員、匈牙利福建同鄉會總會長，2010年5月，佢被上合組織任命為上合組織經濟合作與人文交流促進中心主任，中國國際問題研究基金會特邀理事。嘩！淨係呢啲牌頭，唔打得都嚇得。
不過，佢間郭氏集團先至係真章。據佢網頁介紹，係喺1989年成立，佢號稱經過20幾年嘅努力，郭氏集團已從單一從事國際貿易發展到房地產開發、酒店、化工科技等多元化領域，實體遍佈歐洲、美國、上海、北京、福建等地，而公司總資產近百億元人民幣。另郭加迪目前正喺上海浦東新區陸家嘴中心區域籌建兩棟72層的雙子樓，即上合大廈。呢幢大廈建成後將成為上海嘅新地標。簡單啲講，佢份身家已有百億元，但仲未計上海呢幢勁嘢。
講返三迪，郭加迪早兩年已經買定咗林大隻殼，𠵱家又改埋名做「中國三迪」，都可以肯定買呢隻殼用嚟注入內房資產入去，而除咗話頭炮佢會夾2.7億元作註冊資本同母公司搞合營返西安發展地產項目外，6月時，公司話傾緊出售上手林大淨落嘅植樹同林業產品業務。
小弟翻查年報發現，嘩！呢啲業務經過大撇賬後，最新資產估值竟然仲有14.47億元，按目前總發行股數6.87億股計，三迪每股可套現2.11元。參考近期幾隻內房殼嘅做法，估計三迪出售造林業務後，可能會先派特別股息，跟手再注啲靚資產入去。
仲有喎！中國三迪嘅每股資產淨值高達5.922元，每股折讓高達89%，現價0.66元摸落去好舒服。另外，計及普通股同優先股後，大股東持有公司高達69.42%股權，所以出售植樹同林業產品業務後，派發大筆特別息嘅誘因好大，而目前貨源極度歸邊，任挾唔嬲嗰隻。睇返近期走勢，三迪近呢幾個交易日成交大咗，有啲過倉feel，似似哋想開波，不妨趁佢有啲異動介入，中短線博佢成為同類內房殼股如朗詩（106）、藍鼎（582）、西王糖業（2088）嘅翻版，即10億元市值以上，冇1.46元唔走。
陳承龍
本欄逢周四刊登
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24