經昨晨的世盃外，明年巴西世盃出線隊伍已有明朗形勢；其實國際足協等多個組織，近日已經要為9年後的2022世盃作重要決定：到底是否應該破天荒搞一次冬季世界盃？日前國際足協主席白禮達（右）承認當日明知卡塔爾不宜在夏季比賽，都將世盃主辦權交給他們，是一個錯誤。那為何要「明知」錯而照做，搞出大頭佛先諗計補鑊？
2022年世盃申辦國有還有美國、日本、南韓及澳洲，卡塔爾在4輪投票後當選，而且4輪都是超過10票高票當選（投票來自22位FIFA執行委員會成員）。其實由接納申請、考察場地，以至投票階段，早有評論指夏季達50度的卡塔爾縱使有冷氣球場都不宜球員比賽，以及大量球迷擠到球場；而開冷氣踢波，亦明顯違反環保的全球趨勢。「卡塔爾夏天不能搞世盃」已漸成共識，英國更有聲音指不如更改主辦權，但相信咁搞打仗都似！故下月國際足協會議中應會認真討論改於冬季進行世盃的可能，但這又與歐洲主流聯賽撞晒期，分分鐘要12至1月暫停，又是否可行呢？白禮達話歐洲並非統治世界，不能只遷就歐洲；但世上所有重要球星都踢緊歐洲波喎！
其實，卡塔爾足球水平與競爭對手已冇得比。除了有錢，實想不到他們當選的理由；而投票人明知有這麼嚴重的問題，仍霸王硬上弓投上一票，難怪當日爆出賄賂醜聞。雖然最終無人查出有罪，但相信普羅球迷眼中，已有判決。
方柏翹
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24