早幾日亞視《ATV 2013亞洲小姐競選》喺深圳舉行面試，場面好似異獸戰咁，驚嚇度十足，尤其係16號蕭翠婷成個女版王祖藍咁，真係以為祖藍扮女人參選囉！原來「女版祖藍」蕭翠婷好鍾意選美，舊年佢就以21歲芳齡參加華娛衛視喺內地舉行嘅「2012國際華娛小姐競選」，睇番蕭翠婷嘅選美資料個人相簿，原來以前佢個樣唔係咁「極品」！
蕭翠婷喺個人介紹話自己「熱情、大方、善良、可愛」，三圍係31、25、34，身高165cm，大專程度學歷，嗜好係唱歌，志向係做空姐、模特兒或者歌手。不過，呢個全民投票嘅選美，蕭翠婷喺127位參賽者中係排第108位，當日頭三位嘅美女都有超過6萬幾票數，但蕭翠婷就得5票！冇錯，係5票！
亞姐有機玩公投
「女版祖藍」喺亞姐面試成功彈出，好多人話如果亞姐搞公投，一定會推舉佢當選冠軍。原來亞視今年的確有諗過效法港姐咁全民投票，亞視高層冼偉智（即係正版祖藍舅父）噚日話：「有諗過觀眾同評判一齊投票，有機會係50、50，觀眾同評判各佔一半分數，亦有機會係3、7，詳細要再開會傾。」希望「女版祖藍」打入決賽，等網民投佢神聖一票！
另外，楊玉梅同黃家強等噚日喺銅鑼灣出席「活色．心花」高楠作品展，講到「女版祖藍」面試亞姐，身為大師姐嘅楊玉梅話：「好似祖藍咁出名都冇所謂！」佢認為𠵱家亞姐冇以前選得咁正統喎。
版主：陳基征
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24