全球競爭力報告本港創新僅列23，實屬正常。香江父母同政客一樣，只求穩定繁榮，跌跌碰碰是浪費時間，創新未必食到飯，故走創新路線的朋友，多是冇經濟負擔，而敢於創新的公司，水喉充足者佔盡優勢，好似海天國際（1882）。
對工業家來講，3D印刷將帶來新工業革命，野村報告指，3D印刷概念與全球最大注塑機製造商海天最接近，以速度來講，3D打印現時偏慢，海天可以每秒生產30個10厘米長的針筒，而Makible 3D打印機需時逾半個鐘。
但3D打印勝在應用範圍廣泛，縮短生產周期之餘，毋須使用昂貴模具，Samantha網上查到Makible在香港創立，研發並向設計師售賣價錢相宜的3D打印機，野村強調注塑和3D印刷是互補，非競爭的關係，莫非要拉紅線？
由舊水壺手機演變至iPhone需時廿年，再等3D印刷豈不等至白頭？海天自身業務都好靚仔的，上半年多賺17%，今年收入仲有望創新高添！
雖然港股拾級而上，但攻打敍利亞表決在即，美國聯儲局又議息，泊埋強勢股，就毋須擔心轉身慢的問題！
Samantha
本欄逢周一、三、五刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange