陳小春同應采兒喺今年嘅7.1生咗囝囝Jasper，前晚10點兩公婆丟低Jasper，約咗一男一女嘅朋友去咗上環Three Monkeys餐廳開餐，兩位女士埋完單落樓上車都未停過口傾偈，反而兩位男士冇乜嘢講。
應采兒產後速收身
產後嘅應采兒收身極快，差不多回復產前嘅身形，就算冇化妝個樣都係咁索，皮膚好滑溜。
同朋友輕鬆完後，小春噚日同伊健、謝天華、錢嘉樂加埋林曉峰五個古惑佬，喺清水灣為11月紅館演唱會拍演唱會主題曲《消失的光陰》MV，五個玩水槍又互掉汽水罐失控咁滯。講到演唱會，五子竟然夠膽話唔准五位古惑嫂入場，小春話：「因為謝天華表演有女，所以我哋啲老婆全部唔嚟得。唉，都唔知點開口。」伊健就指嘉樂仔話：「佢老婆有產後活躍症，佢老公今次初試啼聲，驚佢開心到失控影響我哋。」錢嘉樂反擊話：「全個騷得佢（天華）有女嘉賓咋。」五子又話演唱會以戲劇形式進行，隨時會請觀眾上台一齊做戲。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！