稻香（573）不時搞花臣，最出名以「一蚊雞」吸客，嚟緊又有新搞作，就係將旗下泰昌餅家升呢做cafe。稻香CEO梁耀進估計，10月至11月會喺荃灣開第一間店，名為「泰昌Cafe」或者「T-Cafe」。
前港督彭定康都幫襯嘅泰昌餅家，蛋撻同沙翁最受歡迎，轉型做cafe都幾有諗頭，方便客人坐底食個撻，飲杯啡。梁耀進話，呢間cafe仲會提供飯同意粉之類嘅套餐，午市約50元，晚市就60至70元。講到尾，都係想做多啲生意箒。
稻香亦希望喺中餐以外求突破，計劃同日本長崎拉麵品牌RingerHut合作，10月中喺九龍開拉麵店。佢講解，長崎拉麵同𠵱家本港熱賣嘅北海道或者九州拉麵唔同，湯底冇咗層油，仲主打七種蔬菜嘅健康湯底，針對注重健康嘅顧客咁話。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange