東京申奧成功，日本復蘇股再次落鑊，昨剛開車的億和控股（838），集五大爆升動力於一身，係短炒博賺五成的首選，目標上番52周高位1.57元！
億和主攻設計及製造金屬和塑膠模具。舉個例，想整部影印機，裏面的紙匣、碳粉盒，都要先整個模，然後再跟個模去大規模生產，億和提供一條龍服務，先設計及整模，再用模具去生產零部件。由於度身訂造，毛利率特別高，上半年達24.2%，按年升3.7個百分點。
客戶包括Fuji Xerox、Epson、Canon、松下等，均為日本巨企，當地全力復蘇，配合奧運效應沖喜，企業定單勢將急增。今年日圓兌美元急跌15%，億和唔少原材料及機器均由日本進口，匯水又可慳一截。
億和今年定單逐步回升，上半年主力幫客戶整模具，令相關收入創新高。整起模具後，下半年將大規模生產零部件，同時再幫下一批產品整模具，雙翼齊飛下，盈利料全面復蘇。
此外，億和進軍汽車零部件市場，武漢新廠房下半年投產，並已與本田、豐田、福士等大車廠合作，為明年業務爆炸性增長的新引擎。望吓同業敏實（425）的股價走勢，就知前景有幾好。
盈利方面，中期賺2,700萬銀已低無可低，隨着新廠陸續投產，資本開支投放完成，未來純利料大幅回升。昨大成交行第一棍，MACD轉牛，係時候入場！
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange