下個禮拜四就係中秋節，有環保組織調查指港人舊年浪費咗179萬個月餅。如果你買咗月餅食唔晒，又或者收多咗月餅券，唔知點算好，八方建議你交畀深水埗北河燒臘飯店明哥。
最近佢幫平等分享行動收集月餅券，喺下個禮拜五，即中秋節翌日早上，喺元朗、北區、九龍城等14區發起遍地開花行動，向基層市民分享月餅、米粉同罐頭等。唔知社署又會唔會再抹黑人哋派嘢助長露宿呢？
明哥同八方講，早兩日開始代收月餅券，反應唔錯，噚日已收到三、四十張，佢話到時仲會分享埋水果與眾同樂。
下月向露宿者講佔中
講到遍地開花，9月派完月餅，佔領中環行動10月舉行第二輪商討日（D-Day2）。八方聽聞社工復興運動將會落區，直接同基層市民、無家者解釋佔中目的，解講乜嘢叫公民抗命，唔好成日俾人話離地佔中，亦希望基層市民為兩餐溫飽之餘，多啲留意香港政制發展，因為同民生都係息息相關。