思捷（330）近年由董事跳船、大供股、被踢出藍籌之列，負面消息多多，今日公佈全年業績，成街估佢勁蝕㖭。但無論點衰，大贏家應該仲係創辦人邢李㷧，佢舊年底翻兜入股成為第二大股東，手持股份至今賬面賺逾兩成。
邢李㷧舊年11月，思捷大供股前，以每股11.669元增持約2,300萬股，持股量增至5.99%，令佢嘅股東身份曝光；之後再透過供股，令持股量增至10.33%。
假設邢李㷧增持前嘅成本都係11.669元，加埋用8元供股嘅嗰批股份，佢持有2億股嘅成本約20.3億元，呢批貨噚日市值25.2億元，賬面賺24%。
邢生賺到笑，思捷份全年業績就隨時嚇親人，綜合幾間大行報告，估計思捷截至今年6月底止盤數蝕9億至19億元。小股東當然希望到時一地眼鏡碎啦。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange