噚日推介嘅敏華控股（1999）中午發盈喜，帶動股價創逾兩年高。值得留意嘅係，公司單憑五個月業績，已可預示半年盈喜，勢頭有幾勁可想而知。假設盈利按年倍升，則上半年度可賺4.4億銀，年度化市盈率僅11倍，較過去三年平均折讓一成，再配合大行re-rating潮，雖然單日爆升17%，但肯定仍有上升空間，有跟進嘅戰友可慢慢食糊。
東京奪得2020年奧運會主辦權，一眾以日本作為主要市場嘅股份如歐舒丹（973）、德林（1126）隨即炒上，但講到平靚正，就一定要揀利民實業（229）。利民主要產銷小型家電及健康護理產品如電風扇、攪拌機及電鬚刨，乃老牌工業股，接近三成收入來自日本市場，絕對食正日本復蘇概念。截至6月底止，中期盈利1,413萬銀，倒退17%，主要受內地稅制改變，要多繳所得稅所致，單計稅前溢利依然有近一成增長。現價市盈率9倍，息率高達7厘，如此低PE高yield，喺現時屢創新高嘅市況中，可謂絕無僅有。集團手頭現金達2.2億銀兼零負債，現金佔去市值近五成，含金量極高，短炒長揸皆宜。日線圖噚日出現久違嘅陽燭，成功突破橫行區，用NAV價1.25元作目標，潛在升幅25%。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange