萬眾期待，好幾個地區性貨幣危機後，孫柏文及財演行家們講到爛嘅tapering減印，將會喺下周開始嘅聯儲局會議決定。今次其實唔算係退市，對於我呢啲09年量寬一期已做財演嘅人來講，退市其實係流通鈔票總額跌。係呀！跌呀！今次係乜？只係將鈔票總額膨脹速度減慢。點都好，究竟減幾多開會就知。聯儲局話佢哋會睇失業率同通脹率做人，市場就係驚佢哋篤都唔識篤數，去成全想要放水嘅人。
特區篤數個案多
講起夾硬篤數推政策益自己，搵case study淨係睇我哋特區都夠。𠵱家政府放風話要定貧窮線，咁你話用工資中位數嘅某個百分比定，就已經反映推行者想夾硬定人貧窮，因為只要有收入分別，就會有貧窮。如果用相對貧窮線計法，連張超雄議員都話北韓冇貧窮。有次同佢做論壇，佢話貧窮係相對，只要人人食鹹豆一齊饑荒，佢話收貨冇貧窮，呢個就係香港已壞腦社會主義者嘅價值，根本有自己套facts，自己套「公義」。
原來資產係唔計。近年老人「貧窮」人數大升，係因低息。你試吓擺500萬元入銀行做定期，全年有幾多利息？工資中位數五成都冇，500萬元資產係「貧窮」。
最弊日日話有過百萬貧窮戶嘅人原來一路計算「綜援前」收入，即再畀多啲綜援，你小朋友喺學校都係對住過百萬貧窮呢個數洗腦。令我作嘔嘅係社福集團啲演員，當政府話計埋福利時，話反對計公屋嘅補貼。公屋有政府嘅「市值租金」，你畀得個千幾蚊後，點解唔計差額？原來計埋，香港貧窮戶即跌一半。你哋班人玩晒啦？林鄭月娥buy你，呢個係林鄭嘅gross negligence，唔怪得佢以前啲上司覺得佢唔掂。我？唔想再酗酒，冇眼睇。
孫柏文
獨立股評人
http://facebook.com/shuen
本欄逢周二刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange