呢個月成班好友贏到開巷，單計9月份六個交易日，竟然升咗成千點。明明美國話向敍利亞開火，個市又好似食咗豹子膽咁，破完一關又一關。
噚日就食住內地通脹無惡化的「好消息」，A股好似火箭咁爆升，港股成功突破上月中高位，收22750點，漲129點，成交超過670億元。H指仲勁升近200點，資金明顯轉炒中資股，內銀股升到癲咗，民行（1988）炒高逾6%，港股望塵莫及。
美林唱好龍源 目標價10元
個市旺到你唔信，資金由資源股，轉去科技股，再炒手機相關股份，捉唔到資金流向，無入到貨的確好揼心。
不過有個板塊可以留意下，候低吸等下一轉升浪。呢個就係風電股，噚日逆市全線碌低，龍源（916）、華能新能源（958）、華電福新（816）瀉約6%至7%，成交仲要唔少，資金開始走人。不過，眾所周知，內地要搞環保，呢類新能源股大跌過後，隨時又有力炒過。
好似龍源首八個月發電量理想，風電場利用小時亦增逾一成。美林發表報告指，內地不斷發展風力發電，龍源有能力增加更多裝機容量，雖然明年負債資本率或見頂，但預計自由現金流在2016年將轉為正數，故將2014至15年EPS調高1%，目標上望10元，維持買入。
不過，龍源昨收7.72元，調整期剛開始，初步支持位7.5元。
瑪姬兒
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24