多啦A夢呢隻機械貓，果然係一隻招財貓。
上年100隻到訪海港城，令人流激增15%。今年東京派多啦A夢出動，為申辦夏季奧運而出任特別宣傳大使，結果東京成功奪2020年奧運主辦權，呢隻小貓立咗大功，的確值得自豪。
今次日本成功申辦奧運，相信最開心嘅一定係安倍晉三嘞。
據東京官方估計，由今年至2020年呢七年間，奧運料可為日本推動當地經濟達3萬億日圓（約2,340億港元），可創造15萬個就業職位。𠵱家「安倍經濟學」正進行得如火如荼，加埋奧運概念就事半功倍。二來安倍正爭取調高消費稅率，家陣民望提高，成事機會自然增加。所以呢安倍真係要好多謝多啦A夢嘞。
要多謝呢隻貓嘅，除咗安倍之外，仲有中港嘅股民。查實早於上星期五，兩隻深圳上市股份，已借多啦A夢概念炒起，分別係拎到多啦A夢樂園經營權嘅驊威，以及獲授權出首飾嘅潮宏基。
至於港股似乎冇得炒多啦A夢概念，困獸鬥下可炒日本一樣咁紅嘅鬆弛熊。德林（1126）噚日升咗一成，但9日RSI仍未到50，仍有炒作空間。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange