本欄在8月5日主打推介冠軍科技（092），冠軍股價於8月6日單日一度大幅飆升65%。到咗呢轉，就買市值8.6億銀嘅阿仔看通（1059），博翻一番。
看通1997年上市，經歷過亞洲金融風暴，仲有之後2000年科網泡沫爆破、03年沙士及08年金融海嘯。
面對呢啲大場面，看通業績當然亦有起落，好似喺海嘯期，即係截至09年6月底一年度，看通純利得番7,100萬銀，但集團依然都係keep住每年有錢賺，之後更慢慢回勇，純利上到上年8,000萬銀。
業績亮麗 估值平通街
而今年上半年度，看通再下一城，純利大增40%，到7,700萬銀，追貼上年全年純利水位。但看通現價0.115元仲要低過08年10月最慘烈嘅海嘯價0.13元，殘到冇譜。
仲要咁睇，看通喺祖國經營咁多年，家陣祖國生意額高達10億銀，佔咗總收入七成比重。而呢期已經有估計，祖國到咗2015年，喺網絡零售消費將達到1.2萬億人仔，至於互聯網新型資產消費，甚至會上到2.4萬億人仔。看通本身同喺祖國咁優厚條件底下，當然肥過肥仔水。
看通又就快派2013年成績單，呢轉唔好計多，就當全年純利係上半年7,700萬銀起個孖，即係1.5億銀，已經係講緊增長86%，預期PE（市盈率）跌到得番5倍幾。IT科技股當中，看通又係平通街。
而且阿媽冠軍家陣揸住看通近55%，嚟自看通嘅貢獻唔少，所以買看通應該更加直接。睇看通翻一番到0.23元，到時集團預期PE都係得10倍，而PB講緊0.53倍，亦係科技股冇可能見到咁低殘嘅水位。
錢雋
細價股專家
本欄逢周二、五刊出
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24