【廣州直擊】
香港首富李嘉誠（超人）繼拋售「超市王國」百佳後，早前突然宣佈賣甩開業不足一年的廣州西城都薈。本報記者上周踩上西城都薈，發現商場絕非冇得做的「死場」，商場租戶及房地產業人士更一致睇好。有內房分析員認為，超人收手唔玩實屬罕見，撤資中港的舉動越見明顯。
記者：吳永強 馮健鏗 攝影：黃偉傑
旗下的長和系上月29日宣佈，以近33億元出售廣州西城都薈及停車場，為繼放售百佳及市傳以60億元人民幣出售上海陸家嘴商廈後，另一個拋售的中港資產業務。記者曾電郵及電話留言予長和系發言人，查詢近期舉動是否打算撤出中國，惟截稿前未獲回覆。
多品牌進駐 人流不俗
記者今年初及上周，曾前往廣州黃沙站上蓋，離上下九步行街僅數分鐘路程的西城都薈視察，場內有不少港人熟悉的品牌進駐，包括百佳、太興及UA戲院等。雖然上周商場仍有「吉舖」，惟大部份已經租出並進行裝修，明顯較年初時、只有約一成店舖開業理想。人流方面亦算不俗，在下班時間後，有不少人行經商場進入地鐵站。兩次實地考察，無論人流及店舖的開業率，不足三季內已見明顯改善。
西城都薈的地皮資料於99年首次出現和黃（013）年報中，最初原定03年完成的工程亦一拖再拖，直至去年底才開業。負責商場租務的和黃地產的市場部職員稱，現時「出租（率）就八成五，開業按面積計都有七成五」，較和黃年報顯示，截至去年底止的66%出租率再進步。
超人出售「囤積」近15年、開業不足一年兼越做越好的西城都薈，有外資地產分析員認為實屬罕有。該分析員指，「通常一係完全唔run就放售，一係就hold住幾年真係做唔到先賣」。他又指內地商場的營運周期大約3至5年，「通常等開業3年後第一批租戶租約到期，租金就會有ramp-up，但呢個場正式營運咗一年，都過咗個cycle一段時間，唔等埋就話賣都比較罕見」。
事實上，廣州商場租務市場的整體氣氛良好。中原（廣州）董事總經理黃軒明指出，廣州現時「整體零售業的氣氛係好嘅」！雖然商場供應越來越多，惟當地商戶的需求亦相對強勁，近年租金保持每年約5至8%增長。
作為西城都薈商戶的連鎖餐廳太興集團主席陳永安，上周曾前往商場視察今年4月開張的新店。陳永安對商場未來前景充滿信心，「知道（商場現況）個出租能力係一般，不過我打後會睇好嘅！因樓下嘅地鐵又通咗，加埋樓上住宅已經入晒伙……我哋𠵱家生意都唔錯」！
「或畀個仔買外國基建」
除廣州項目外，長和系近期亦頻放售中國資產，已惹來內房龍頭萬科董事長王石的關注，他於微博上指李嘉誠出售資產的舉動「這是一個訊號，小心了！」外資地產分析員認為，這是李嘉誠進一步從內地撤資的「訊號」，「雖然誠哥唔係等錢洗，但佢畀人有種感覺係想攞返啲錢，畀個仔去買多啲外國基建項目，話晒一年都可以有超過十厘回報，加上風險又低過喺中港兩地賣樓、搞商場」。
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24