有料之人，邊個唔想做主角？不過一套戲只有一個黃飛鴻，如果未輪到你做，點算？就像巴西超新星尼馬，今季以近6千萬歐元身價轉投巴塞；但球隊本身已有「超級黃飛鴻」美斯，搞到尼馬竟要淪為「牙擦蘇」！
巴塞今季最初3場比賽，尼馬連正選都無，每場起碼在後備席坐足一個鐘睇波。如果佢係自大狂，肯定已經發晒脾氣兼透過傳媒向教頭開火；但尼馬卻是做後備時冷靜；落場時落力。阿根廷籍教頭馬天奴於歐洲名氣不大，首次執教歐洲球會便是巴塞，當初不禁有人質疑「佢掂唔掂㗎」？然而，馬天奴要求尼馬先任後備，只負責感受比賽節奏和氣氛，暫時看來，這決定是正確的。
到近兩場比賽，乘美斯有傷，尼馬終於坐正！仲唔大展身手，搶返個主角嚟做？一於入波入波入波！不過有看上仗擊敗華倫西亞的球迷，都會發現尼馬每次觸球的首要決定，都是傳球而非射門。沒有多餘賣弄、沒有勉強浪射。首3場西甲尼馬入球係零，但上仗就交給美斯一記助攻。不難看出尼馬想法，不介意暫時做配角，冷靜沉着做好本份，志在全力融入球隊，這於初來埗到之時，確實比自己於射手榜入多少球更重要。
一套戲的確只得一個主角；但如果你努力做好「牙擦蘇」這角色，黃飛鴻開戲，點會唔預你？上周六尼馬返回巴西國家隊，立即又做返「黃飛鴻」了，領軍大炒澳洲。真正有料之人，唔會成世做「牙擦蘇」；若他在巴塞能維持現有心態，假以時日，「黃飛鴻」點會唔輪到佢？文：方柏翹
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange