一班歌手同藝人前晚喺紅館演出無綫慈善騷《星光熠熠耀保良》，《星夢傳奇》嘅鄭俊弘同羅鈞滿等首次踏足紅館，跟巫啟賢合唱，鄭俊弘話興奮到唔想落台，佢話：「呢兩個月過嘅係crazy life，發夢都冇諗過會上紅館。」
因合約問題四年冇亮相無綫嘅張敬軒，得着透視裝嘅王菀之力撐同佢合唱，軒仔話王菀之直情係賣大包，打斜都贒到嘢。軒仔又話正式推咗唔拍無綫劇《老表，你好嘢！》續集，王菀之就話未知個劇幾時開，等無綫安排。
同場仲有星煥嘅謝安琪，講到嚟緊《勁歌金曲》總選會一人一票選最受歡迎男、女歌手，謝安琪就話：「每個頒獎禮都有唔同意見，我尊重每個機制，呢個投票好特別。」
陳凱琳捐200蚊
譚詠麟（阿倫）同李克勤冇份參選，但克勤話佢或者投票畀容祖兒同劉浩龍，旁邊嘅阿倫話：「你催婚呀？」克勤玩嘢：「你講咋，祖兒會打我㗎，我係為分唔係為婚。」
此外，出爐港姐冠軍陳凱琳因靚、平胸、家底厚再加撐真普選，話題多多，廣受市民關注，前晚佢以嘉賓身份喺台下睇騷，雖然冇錢喺身，但佢都舉手用200蚊認購咗隻「零零狗」，講到明要遲找數，司儀鄭裕玲讚佢有善心㖭。
版主：陳基征
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange