放完暑假，昨日（8號）新馬季開鑼，一眾馬評人都趕緊完成暑期功課，為馬迷貼番幾隻心水靚馬。
馬圈向來是男人世界，但偏偏有幾位女馬評人在這個圈打滾，她們強調自己能立足，並非靠關係，而是戰績和知名度，「咪以為喺馬圈中工作就可以識有錢人或者有貼士，佢哋自我保護性好強，好難熟絡，難聽啲講句，佢哋都驚你黐佢啲金糠」。珊翠絲在馬圈工作多年，自言圈中人和她說的內幕，都是用多年成績換來的。
而私家貼士多多的連家欣，則不信馬房內幕，突出自己靠勤力和眼光，「好多貼士其實係馬房傳出來，賭馬注額越大，賠率越細，講真有幾多人願意分薄獎金？唔講嗰啲反而跑出呀！」
記者：羅鈺歡
攝影：劉脗文 胡堅
馬匹抖暑，馬評人卻要馬不停蹄趕功課，珊翠絲自言馬評人無假放，「啲馬放暑假，我要去英國朋友個馬場睇新馬，哪怕係走馬看花，但起碼可以帶到少少資訊畀觀眾已經好好」。
另一女馬評人連家欣也不敢歇腳，「馬匹在暑假休息少運動，肌肉鬆弛兼重磅，而且不少馬匹會在暑假轉倉，或者有新馬到港，所以7月尾已經開操，所有人、事和馬我都要重新觀察」。兩女皆戰意高昂，完全無抖暑之意。
珊翠絲落圈傾偈索料
訪問開始於上季賽馬的煞科日，珊翠絲當日上午11時已到沙田馬場準備直播工作，從會員席門口走到直播室，沿途不停有人向她招手示好，有些更是馬圈老前輩。她邊行邊解釋：「做咗咁多年，同圈中人唔多唔少建立咗感情，如果唔係邊會同你講咁多嘢。」
經過多重守衞入到直播室，她第一時間拿起排位表看看，手執咪高峯流利地分析當日心水馬匹。記者問她有沒有落注，她說買了一隻，只投注幾百元而已，笑言多年來從未因投注賽馬獲大利，「好簡單啫，賽馬向來買大賠少，反而股票買中會大升」。身為馬評人，卻彈馬讚股，只因她想大家量力而為，不要孤注一擲。
作為馬評家，她說自己不緊張贏錢，獨愛貼中冷馬的滿足感，「每隻馬出場前一刻都可能有變化，好難話畀你知點貼」。她指經驗和賽前賽後的功課好緊要，但勤力並不等於有成果，試過連續兩星期食白果，結果被人打電話來挑機，「有觀眾打上節目，大大聲話，『你之前嗰幾隻都輸晒喎』！嗰刻真係好尷尬，但我好肯定咁同佢講，其中一隻一定得，你今個星期再買多次睇吓」。結果終於押中挽回面子，「坐得呢個位就要預咗畀人話，我知唔會全世界人都鍾意你，我信大部份馬迷都係明事理嘅就夠」。
雖然外界一直傳聞，珊翠絲強項是依靠馬圈中人收料，但她對於被這樣形容有點反感，「我只係鍾意同馬圈人傾偈，其實馬主在陣中，都未必知道對手嘅馬係點，而我知道乜嘢咪互相交流吓囉，我又夠膽直接問啲冇人敢問嘅問題，而且呢啲唔係乜嘢秘密，唔需要呃人，我只係將聽到嘅消息同馬迷分享」。她更暗寸行家，指坐廠的其他馬評人甚少落圈「傾偈」，料自然比她少。
連家欣勤睇晨操背料
另一位女馬評人連家欣出名多獨家料，但她強調是靠自己。她在馬季開操日早上6時已到達沙田馬場草地，等候與一眾練馬師做訪問，「每年開操日都有開香檳儀式，呢日係了解馬圈喺暑假有乜嘢轉變嘅最好機會，例如轉倉、換馬房及有新馬到埗等」。
她已經習慣了每天早晨泡在男人堆中的生活，「每朝6點前一定要到馬場睇晨操，夏天35℃又曬又熱，冬天得6℃都要繼續睇，影低啲馬嘅步法同練馬師動態；尤其係新馬，當個練馬師緊張嘅話，即係隻馬受重視，咁就要多加留意。要長遠睇，唔會即時見效果，呢啲就係私家料來源喇」。她翻開一張印着密麻麻格仔的A4紙，上面印有1,000隻馬匹的名和馬房資料，「我會用心記住緊要嗰百幾隻資料，其餘就靠呢張貓紙寫低」，真的少一點記性都吃不了這行飯。
個子矮小的她，站在一眾高大男人群中訪問，輕柔的聲線也特別突出，「其實女仔做賽馬工作都好多好處，騎師容易接受，訪問又會禮貌啲，少啲粗口」。她知道今時今日仍有男士覺得「女人邊識馬㗎」，卻堅持以努力換取外界好評，「如果人哋睇唔起我，我會做多啲功課，攞多啲重點資料」。
馬圈工作男多女少，怪事緋聞一定多，「呢行好奇怪，如果為咗識有錢人而做賽馬工作的女仔，最終都唔會成功，因為有錢人都好驚人黐金糠。試過有個女行家係為咗識有錢人入行，幾年間分別同過三個馬圈人拍拖，但最終都係分手收場，𠵱家繼續過平淡生活」。記者問是誰，她不肯透露姓名。
你想爆?幫你爆!
熱線電話：2990 7225
mailto:[email protected]
WhatsApp：9131 4511
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange