【銅鑼灣】側田同韓籍女友感情穩定，佢視女友係最愛，仲話大家都見過雙方家長，女方親戚仲開始向側田逼婚，其實佢哋都想今年內完婚，畢竟37歲嘅側田都係時候成家立室。側田雖然𠵱家轉戰內地，不過每次佢喺香港都同女友秤不離砣，佢哋前日下晝約5點，又孖咇拍拖去銅鑼灣利園買咖啡同蛋糕撐枱腳。
撞正黃宇詩
光頭側田戴住佢頂波點鴨舌帽，一身便服同孭住背囊出現，女友就着住格仔短裙晒玉腿，佢哋拍拖去利園Cova，唔知係咪側田返咗內地發展太耐，佢連Cova搬咗舖都唔知，結果同女友上演一幕迷銅記四圍揾路，仲要走去商場服務台問路，跟住依指示先搵到間舖。側田同女友去到Cova柯打完咖啡，又喺蛋糕櫃前揀甜品，sweet到爆。側田好識做拎銀包畀錢，跟住佢哋仲坐埋一邊等外賣。其間側田發現記者影相，仲笑笑口揮晒手，表現大方。
側田驚女友怕攰坐低等外賣嗰時，咁啱撞見黃宇詩，大家仲好有禮貌打招呼，黃宇詩拎咗張卡片出嚟派畀佢哋，之後再傾多一陣先走人。
採訪、攝影：吳耀輝
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！