中大出版社出版「腎延敏行」一書，由三位腎科專家醫護人員李錦滔醫生、周啟明醫生、羅民貞教師聯手撰寫。左丁山托賴無任何慢性病，但腎病呢樣嘢，不可不防，究竟病發之前，有冇徵兆呢？我地好驚有咗腎病都唔知噃。
本書講及，醫生會根據腎小球過濾率（glomerular filtration rate, GFR）來計算腎功能，正常人係每分鐘一百毫升，病人之GFR過濾率可能只有三十毫升。如何量度GFR，就係驗血時測量肌酸酐值（serum creatinine），然後用此值估計GFR，通常透過GFR之升高下降（譬如每半年驗血測量一次，可以睇到時序系列數據），血液肌酸酐值與GFR有反比關係，血液肌酸酐值不斷升高就顯示腎功能有變差趨勢，正常值一般為53至106，需要注意及之。高血壓亦屬早期腎病徵狀，另外，如有蛋白尿及血尿，也可能係先兆。
如果發現上述情況，吸煙者要立即戒煙，血壓高人士要控制血壓，有蛋白尿者要睇醫生服藥，專科醫生如有懷疑，會做腎組織檢查以確認此病，因為慢性腎病會與心血管疾病形成惡性循環，最好同時醫治。
「腎延敏行」此書載有不少普通我地經常忽略嘅資料，日常出街食飯全不戒口，原來對腎病有害，左丁山好彩冇病箒，但睇睇吓都有啲驚，不妨抄少少俾大家參考，欲窺全豹，最好買呢本書認真研讀。作者話腎病患者要小心飲食，注意戒口，適量進食蛋白質食物（食量請看該書90至91頁），例如雞蛋、雞髀、黃豆、白麵包、饅頭等等，要減少食用高鈉食物如腸仔、叉燒、煙肉、豉油雞、午餐肉、蝦餃燒賣、熱狗、即食麵、梅菜、鹽焗花生果仁、罐頭湯、調味料等等，在酒樓茶餐廳少吃涼瓜牛肉炒麵、福建炒飯、豬扒即食麵、㗎喱牛腩飯、焗豬扒飯等等。吃蔬菜就要適量吃冬瓜、節瓜、生菜、菜心、豆角、椰菜等；減少吃高鉀食物如西蘭花、冬菇、番茄、番薯、西洋菜、茄子、芋頭、菠菜、紅蘿蔔等；生果可吃雪梨、蘋果、藍莓，少吃菠蘿、西瓜、香蕉、奇異果，所有果汁、龍眼、芒果、橙；濃茶，即溶咖啡不可飲，杞子、百合、北杏、黨參、木耳等亦係高鉀食物，可免則免，此外還有其他，慢性腎病病患者在治療期間，看本書有益！綜合而言，就係減吃高鉀、高鈉、高磷食物，切記千萬不可吃楊桃。作者建議菜式以清淡為主，見104至105頁。