走在街上遇着橫風橫雨，戲院原來是避雨好去處，結果遇上了一場《激戰》，果然係大片格局，緊張刺激，肯定係今年「最佳電影」大熱之選，但若果金像獎會加多個最佳運動電影獎項的話，我還是會投《狂舞派》。
首先分別就在於感染力吧，那天晚上睇完《狂舞派》之後，腳步彷彿輕咗10磅，不知幾恨成為那班dancer一分子；而呢日睇完《激戰》呢，離開戲院嘅步伐好似沉重咗，然後慶幸自己唔係戲中不幸人士嘅其中一個。
其次是門檻太高吧，《激戰》講的係格鬥，係一樣偏向觀賞性嘅運動，即是睇嘅人唔少但玩嘅人冇乜，兩位男主角嘅肌肉係賣點，但唔少都係抱住睇熱鬧嘅心情去睇肉，要轉化成自己操埋一份嘅動力？就在太遙遠嘞，肚腩都未減得掂啦。相反《狂舞派》呢，講嘅係熱情，有心就可以一齊玩，跳舞也好，耍太極亦好，都係輕易踏出第一步嘅事，就好似上YouTube睇鄭多燕咁方便。
仲有一樣鍾意《狂舞派》而唔係《激戰》嘅原因，係真實感，OK，兩套戲都係編劇度嘅，但係前者好容易畀你感覺到似係睇緊紀錄片咁實在，後者呢就無時無刻提醒緊你係睇緊戲。睇運動主題嘅電影，真實感係必須嘅，當年睇《少林足球》，見到一腳波可以摧毀成個球場時真係想提早離場，但唔捨得周星馳先繼續坐定定。其實想拍運動片的話，用真人真事去拍，分分鐘效果仲好，彭于晏響《激戰》咁型仔，但論感人程度其實唔及佢之前一套《翻滾吧!阿信》。無他，阿信一樣有肌肉，兼且仲係真人真事㖭，冇添加味精，結果係淡淡然，反而催淚，攞冠軍響電影係必須，響現實運動世界呢，其實只係其中一部份。
好欣賞張家輝戲中教拳嘅第一金句，係節奏！呢樣確實係運動以致生活嘅關鍵，平時運動未必可以輕易參透。不過本周金句王，就非李慧詩莫屬，攞完金牌爆出句「其實係想贏得教練嘅擁抱」，絕對係感動喊位，賺人熱淚。
KEYMAN
now TV主持
激戰拍續集，但家輝話唔敢再變筋肉人？
到底練定唔練？即睇足本《亂噏24》，專訪張家輝、林超賢！
http://bit.ly/appletalk24